Орон нутагтаа эко барилгын материал үйлдвэрлэж байгаа сайн туршлагыг онцлов
Найрамдал төслийн хүрээнд Дархан-Уул аймагт ажиллаж байгаа Зүүн өмнөд Европын нутгийн удирдлагын консорциумын төлөөллүүд Эко ноос ХХК-ийн үйл ажиллагаатай танилцав.
Нөхөн сэргээгдэх цэвэр түүхий эдээр хийсэн экологийн бүтээгдэхүүн болох хонины ноосон барилгын дулаан тусгаарлах материал дэлхий нийтэд эрэлт хэрэгцээ ихтэй байна.
Эко ноос компани барилгын материалыг орлох байгалийн цэвэр бүтээгдэхүүнийг монгол хониныхоо ноосоор үйлдвэрлэж байгааг онцолж үйлдвэрлэлийн орчин нөхцөлтэй танилцав.
Эко ноос компани хэрэглэгчдэд эрчим хүчийг хэмнэх, дулаан алдагдлыг бууруулах, гал дэмждэггүй, дуу чимээ тусгаарлах, байгальд ээлтэй, хүний эрүүл мэндэд хоргүй экологийн цэвэр бүтээгдэхүүн хэрэглэх боломж олгож байгаа нь онцлог бөгөөд зах зээлээ тэлэх асуудалд анхаарал хандуулж дэмжих нөхцөл боломжийг судлах тухай энэ үеэр хуваалсан юм.
Барилгын материалыг орлох байгалийн цэвэр бүтээгдэхүүнийг хэд хэдэн оронд хэрэглэж байгаа ч ирээдүйд байгальд болон хүний эрүүл мэндэд ээлтэй үйлдвэрлэл хөгжих, хүн хүч, тоног төхөөрөмжийн хувьд илүү дэвшилттэй болох зах зээлээ өргөжүүлэх боломжтой гэдгийг онцлов.
