Ё.Батболд: Их ажлын дараа хүний амь авраад баяртай хөөртэй буцдаг
Түргэний тэрэгний жолооч аавынхаа ажил дээр очих бүрдээ шуурхай дуудлага авч галын том машинд суугаад давхих онцгой байдлын аврагч нарыг хараад баатарлаг үйлсээр нь бахархдаг байсан бяцхан хүү өнөөдөр хором бүрээр хэмжигдэх хариуцлагатай ажилдаа цаг хугацаатай уралдан зүтгэх аврагч болжээ.
Идэр есийн хүйтэнд галд шатаж нурсан байшингаас ээж хүү хоёрыг хамт олныхоо хүчээр гаргаж амь насыг нь аварч байсан, үерийн усанд боогдсон иргэдэд тусламж үзүүлж олон өрх айлд тусламж үзүүлсэн гэх мэт баатарлаг гэхээсээ илүү буян дагуулсан ажил үйлсээрээ бахархах дурсамжуудаасаа бидэнтэй хуваалцав.
Гал түймэр унтраах, аврах 22-р ангид найм дахь жилдээ ажиллаж, тусламж хэрэгтэй байгаа хүмүүст ямар ч үед туслахад бэлэн хамт олонтойгоо шавхагдашгүй эрч хүчээр дүүрэн хөдөлмөрлөж байгаад тэрээр баяртай байв. Дуудлага аваад 30 секунтын дотор хувцсаа өмсөөд бэлэн жагссан байдаг гэх ганцхан өгүүлбэр нь хариуцлага, бэлэн байдал, дэг журам гэдэг үгсийг илтгэнэ.
Эрдэнэт хүмүүний амь нас, эрүүл мэнд, эх орныхоо аюулгүй байдлын төлөө зоригтой, зогсолтгүй хоёргүй сэтгэлээр хөдөлмөрлөж буй аврагч таны үйлст талархъя.
