1111 төвд ирсэн гомдлын дагуу лхагва гарагт ЗГ цагаан сарын амралтыг хэлэлцэнэ

Энэ долоо хоногийн лхагва гарагийн Засгийн газрын ээлжит хуралдаанаар цагаан сарын амралтыг хуульд харшлахгүйгээр хэрхэн зохицуулах талаар хэлэлцэхээр болжээ. Засгийн газрын 1111 төвд долоо хоногийн дотор 257 иргэнээс санал, гомдол ирсний дагуу ийн товлосон аж.

Нийтээр тэмдэглэх баярын тухай хуулийн 4.1.3-т “Цагаан сараар билгийн тооллын хаврын тэргүүн сарын шинийн 1, 2, 3-нд амарна” гэж заасан байдаг. Энэ жилийн хувьд шинийн нэгэн тасарсан тул Цагаан сарын баяраар ердөө бямба, ням гарагт амраад даваад нь ажилдаа орохоор зохицуулалттай болж таарч буй юм. Эрх баригчид Нийтээр тэмдэглэх баярын тухай хуульд өөрчлөлт оруулахаас нааш ямар ч аргагүй гэдэг байр суурийг илэрхийлж байсан билээ.