Нийт 1.4 тэрбумын төсөвтэй хөдөлмөр эрхлэлтийг дэмжих санхүүгийн дэмжлэг зарлагдлаа
Энэ онд Дархан Уул аймагт иргэн аж ахуй эрхлэгчдийг дэмжих, малчдын хөдөлмөр эрхлэлтийг дэмжих, ахмадын хөдөлмөр эрхлэлтийг дэмжих, ХБИ-ийн хөдөлмөр эрхлэлтийг дэмжих зэрэг санхүүгийн дэмжлэгт нийтдээ 1.4 тэрбумыг төсөвлөсөн байна.
Иргэн аж ахуй эрхлэгчдийг дэмжих санхүүгийн дэмжлэг өмнөх онуудад 10 сая байсан бол 5 саяаар нэмэгдэж 15 сая болж, 600 сая төгрөг 40 төсөлд олгогдох юм байна. Ахмадын хөдөлмөр эрхлэлтийг дэмжих санхүүгийн дэмжлэг 8 сая байсан бол 2 саяар нэмэгдэж 10 сая болж 30 төсөлд 300 сая төгрөгийн санхүүгийн дэмжлэг үзүүлэх юм байна.
ХБИ-ийн хөдөлмөр эрхлэлтийг дэмжих төсөл 50хувь нь эргэн төлөгдөх нөхцөлтэй 10 саяын төсөлд 20 иргэнд, малчдын хөдөлмөр эрхлэлтэд 8 саяын төслийн дэмжлэгийг 20 иргэн тус тус олгох юм байна.
2024 онд 1.4 тэрбумын төсөвтэй санхүүгийн дэмжлэгт 187 хүн хамрагдаж, 307 ажлын байр шинээр бий болгосон гэв. Энэ жилийн тухайд тусгагдсан санхүүжилтийн хэмжээ өмнөх оныхтой ижилхэн боловч зарим чиглэлд төсөлд олгогдох санхүүжилтийн хэмжээ нэмэгдэж байгаатай холбоотой төсөлд хамрагдах иргэдийн тоо буурах юм.
3-р сарын 25-наас 4-р сарын 14 хүртэл төсөлд хамрагдах иргэдээс материалаа хүлээн авч 45 хоногийн хугацаанд дараагийн шатны шалгаруулалтууд хийгдэж 5-р сарын 15-нд төсөлд шалгарсан иргэдэд хүүгүй, барьцаагүй төслийн санхүүжилт олгогдохоор төлөвлөгдсөн байна.
